Пратеникот на СДСМ, Александар Кирацовски, го прифати извинувањето на бизнисменот Зоран Азманов, кој изјави претходно дека Кирацовски нарачувал текстови против него во еден медиум. Азманов рече дека бил погрешно информиран и дека од трето лице дознал за наводното влијание на Кирацовски во медиумот.
Кирацовски претходно се закани со тужба, а во последниот свој коментар на фејсбук вели дека ова е „светол пример на доблесно извинување“.
„После моето укажување и најавата на тужба за лажното информирање на јавноста и мое клеветење, господинот Азманов јавно се извини и побара повлекување на лажната вест.
Жалам што мораше на овој начин, преку најави на тужби за клевети да се докажува вистината, но тоа е единствениот начин во нашето, со лажни вести заразено, општество.
Сепак ова е светол пример на доблесно извинување.
И уште еднаш…Трендот на лажни вести мора да запре.
На хаосот од инсинуации кои ја искривуваат вистината мора да се стави крај.
Демократија Да, анархија од лаги и измислици Не!“, напиша Кирацовски.