Обвинетите за демолирање на Народната канцеларија на претседателот Иванов во центарот на Скопје на вториот ден од протестите на Шарената револуција, по барање на обвинтелката од ОЈО, засега со одлука на судијката која го води случајот се во 30-дневен куќен притвор.
На оваа одлука има жалба од обвинителката во Апелација за притвор во Истражниот затвор во Шутка. Обвинителката и вчера остана на барањето двајцата обвинети Никола Аризанов и Филип Наковски да надоместат штета од 880 илјади денари. По забелешката кој и како ја проценил штетата и како ќе се утврди дека целата ја сториле тие, останува да се направи вештачење до 13-ти мај и да се утврди за колкава сума се работи.
Во меѓувреме, според извори во Кривичниот суд, врз судијката која го води случајот бил вршен силен притисок од власта преку нејзините претпоставени, процесот да го заврши што побрзо и на двајцата да им одреди затворски казни.
Целта за ваква нелогична и ригорозна санкција, според изворите на Либертас, е нивните затворски казни да влијаат врз учесниците на Шатената револуција, да бидат заплашување, но и провокација да бидат предизвикани на агресивно однесување за време на протестите. Тоа, велат нашите избори, е еден од плановите на власта како да ја неутрализира и разбие Шарената револуција која од ден на ден се шири низ се повеќе градови низ Македонија.